హిట్టా? ఫట్టా? : చిరంజీవి మాటల్లోనే హింట్

 చిరంజీవి సినిమా అంటే మమూలు గా నే ఆంధ్రా లో బాగా క్రేజ్. సినిమా హిట్టా, ఫట్టా అనే దానికి సంబంధం లేకుండా బాగా ఓపెనింగ్స్ ఉంటాయి. అయితే సినిమా హిట్టవుతుందా ఫట్టవుతుందా అనేది సినిమా లో పనిచేసిన వాళ్ళకి జనరల్ గా ఒక ఐడియా ఉంటది (అయితే వాళ్ళ అంచనాలు కూడా ఫెయిల్ అవ్వడం అప్పుడప్పుడు జరుగుతుంటుంది). చిరంజీవి సినిమాలు రిలీజ్ అవడానికి ముందు జరిగే ఆడియో ఫంక్షన్స్ ని బాగా గమనిస్తే, సినిమా హిట్టా ఫట్టా అని గనక చిరంజీవి కి ముందే ఒక ఐడియా ఉంటే చిరంజీవి మాటల్లో ఆ విషయం క్లియర్ గా అర్థం అవుతుంది..

 ఎందుకంటే- ‘జానీ ‘ సినిమా రిలీజ్ కి ముందు చిరంజీవి ఒక పేద్ద ఇంటర్వ్యూ ఇచ్చాడు. సినిమా ఎలా వచ్చింది అంటే – “బాగా రాలేదు” అని బయటికి చెప్పలేక – “టెక్నికల్ గా బాగా వచ్చింది” అన్నాడు. ఆ సమాధానం తో తృప్తి చెందని విలేఖరి ఎన్ని సార్లు అదే ప్రశ్న ని ఇటు తిప్పి అటు తిప్పి అడిగినా ఒకటే సమాధానం- “టెక్నికల్ గా బాగుంది”. ఆ రోజే అనుకున్నా – జండా పై కపి రాజా అని. ఆ తర్వాత “అందరివాడు” అనే సినిమా ఆడియో రిలీజ్ చేసేటపుడు – సినిమా గురించి మాట్లాడకుండా కావాలనే – “గోవింద రాజు క్యారెక్టర్ ని ఎవరూ అనుకరించకండి, ఇది కేవలం పాత్ర రీత్యా ఆ క్యరెక్టర్ ని తాగుబోతు లాగా చూపించాం” గట్రా గట్రా మాట్లాడాడు. జై చిరంజీవ అప్పుడు కూడా – “మంచి వ్యక్తులతో పని చేసిన అనుభూతినిచ్చింది ఈ సినిమా” అంటాడే కానీ మంచి సినిమా తీసారు మా వాళ్ళు అనడు.  స్టాలిన్ సంగతి గుర్తుండే వుంటుంది..”కమర్షియల్ గా ఎలా ఉంటుందనే విషయాన్ని పక్కన పెడితే మంచి సినిమా తీసామన్న తృప్తి మాకందరికీ ఉంది” అన్నాడు. ఇంక చిరుత కి ఏం చెప్తాడో చూసి దాన్ని బట్టి కొంచెం గెస్ చేద్దాం అనుకుంటే, తెలివి గా ఆడియో ఫంక్షన్ లేకుండా చేసారు. కొంత లో కొంత పాజిటివ్ గా మాట్లాడింది జల్సా సినిమా కే.

ఈ నేపథ్యం లో – మొన్న మగధీర ఆడియో ఫంక్షన్ లో ఏం మాట్లాడుతాడో అని జాగ్రత్త గా చూసాను. చాలా రోజుల తర్వాత చిరంజీవి పూర్తి గా పాజిటివ్ గా మాట్లాడాడు. రాజమౌళి ని నంబర్ 1 డైరెక్టర్ అన్నాడు. సినిమా ఖచ్చితంగా హిట్ అవుతుంది అన్నట్టు మాట్లాడాడు. పాటల గురించి ఏమీ మాట్లాడకుండా ఓన్లీ సినిమా బాగా వచ్చింది అన్నట్టు మాట్లాడాడు. మరి నిజంగానే సినిమా అంత బాగా వచ్చిందా? వాళ్ళు అంచనా వేసినట్టు గానే జనాలకి కూడా ఎక్కుతుందా? అనేది తెలియాలంటే – ఇంకొన్ని రోజులు ఆగాల్సిందే!!!