రామ్ చరణ్ ని చూసి మహేష్ బాబు భయపడుతున్నాట్ట :)

 

ఇవాళ డెక్కన్ క్రానికల్ పేపర్ లో వ్రాసిన విషయం చదివితే నవ్వొచ్చింది. మహేష్ బాబు, రామ్ చరణ్ ని చూసి భయపడుతున్నాడు అన్నట్టు గా వ్రాసాడు.

మగధీర పెద్ద హిట్. అందులో సందేహం లేదు. అంతకు ముందు గ్యాంగ్ లీడర్, ఘరానా మొగుడు టైం లో వరస గా తన రికార్డులని తానే బద్దలు కొట్టుకుంటూ చిరంజీవి ముందుకు వెళ్తే, సమరసింహారెడ్డి, నరసింహ నాయుడు సినిమాల తో బాలకృష్ణ సరికొత్త రికార్డులు నెలకొల్పాడు.సింహాద్రి తో జూనియర్ ఎన్‌టీయార్ కొన్ని రికార్డులు తనపేరున జమ చేసుకుంటే ఆ తర్వాత చిరంజీవి మళ్ళీ ఇంద్ర, ఠాగూర్ ల తో విజృంభించాడు. ఈలోగా వచ్చిన పోకిరి తెలుగు సినిమా స్టామినా ఇంతుందా అనేలా వసూళ్ళు తెస్తే ఇప్పుడు దాన్ని అధిగమించే దిశగా మగధీర దూసుకు వెళ్తోంది. ఇదంతా ఒక సహజ ప్రక్రియ. మగధీర సినిమా కలెక్షన్స్ ని క్రాస్ చేసేవిధంగా రేపు ఇంకో సినిమా వస్తుంది.ఒక హీరో పెద్ద హిట్ కొట్టినంత మాత్రాన మిగతా హీరోలు భయపడుతారు అనుకోవడం అమాయకత్వం. కానీ ఒక పత్రికలో అలాంటి “అమాయకపు” ఐటెం ని వ్రాయడం ఏ తరహా జర్నలిజమో వాళ్ళకే తెలియాలి. ఇప్పుడే కాదు, గతం లో ఇంద్ర రిలీజ్ కి ముందు కూడా డెక్కన్ క్రానికల్ లో ఇలాంటి న్యూసే ఒకటి వ్రాసాడు- “Chiru has sleepless nights over Jr NTR” అని. అప్పుడు చిరంజీవి ఇంద్ర సినిమా, జూనియర్ అల్లరి రాముడు సినిమా ఇంచుమించు ఒకేసారి రిలీజ్ అవ్వనుండగా అలా వ్రాసాడు అప్పుడు.

 
ఎన్నో ఫ్లాపులొచ్చినతర్వాత నువ్వు వస్తావని హిట్ అయితే నాగార్జున ని అడిగారు-“ఇది కూడా ఫ్లాప్ అయివుంటే మీ పరిస్థితి ఏంటి ” అని. “ఆకాశం క్రుంగి పోయేది కాదు, భూమి బద్దలయేదీ కాదు, నేను మళ్ళీ ఇంకో సినిమా తీసేవాణ్ణి అంతే”.  ముమ్మాటికీ నిజం. మన తెలుగులో స్టార్ హీరోలకి ఒక అదృష్టమేంటంటే ఒకసారి స్టార్ ఇమేజ్ వచ్చాక ఎన్ని ఫ్లాపులొచ్చినా వాళ్ళకి ఓపెనింగ్స్ వస్తూనే ఉంటాయి, ప్లస్ మళ్ళీ ఒక్క హిట్ వచ్చిందంటే పూర్వవైభవం వచ్చేస్తుంది. ఎందుకంటే, ఒకసారి “యాక్సెప్ట్” చేసాక తెలుగు ప్రేక్షకులు స్టార్ హీరోలని ఇక ఆదరిస్తూనే ఉంటారు. అందువల్లే మన హీరోల్లో అభద్రతాభావం తక్కువ. అంతే కానీ డెక్కన్ క్రానికల్ లో వ్రాసినట్టుగా ఒక హీరో హిట్ కొట్టగానే ఇక మిగతా హీరోలందరూ బెంబేలెత్తిపోయి, నిద్ర మానేసి రాత్రి పగలు అభద్రతా భావం తో బాధపడి వ్యూహాలు మార్చుకుంటూ ఉండరు 🙂