7 habits of highly effective people లో :)

 

ఇంటర్మీడియెట్ లో ఉన్నపుడొకసారి యండమూరి మీద అభిమానం తో విజయానికి 5 మెట్లు
అనే పుస్తకాన్ని చదివాను. అందులో ప్రస్తావించాడీ పుస్తకాన్ని. “స్టీఫెన్ రాబర్ట్
కోవే వ్రాసిన ఈ 7 habits of highly effective people అనే పుస్తకాన్ని తెలుగులోకి
అనువదించడానికి రైట్స్ కోసం ఆయనకి ఉత్తరం వ్రాసాను, ఆ పర్మిషన్ వచ్చేయగానే
ఆ పుస్తకాన్ని తెలుగులో అందిస్తాను” అని. అయితే యండమూరి నుంచి ఆ తర్వాత ఆ
పుస్తకం ఏదీ రాలేదు మరి. సరే, యండమూరి ప్రస్తావించాడు కదా అని ఆ
పుస్తకాన్ని చదువుదామని ప్రయత్నిస్తే పుస్తకం దొరకలేదప్పట్లో మా వూరి
పరిసరప్రాంతాల్లో. ఇక నేనూ ఆ విషయాన్ని మరిచిపోయాకెప్పుడో- ఇంజనీరింగ్ లో
ఉన్నపుడు దొరికింది ఈ పుస్తకం. సరే, చదివాను. ఈ పుస్తకం ఎలా ఉంది, మిగతా
సెల్ఫ్-హెల్ప్ పుస్తకాలకీ దీనికీ తేడా ఏమిటి, ఇది ఎందుకు ఆ రోజుల్లోనే పది
మిలియన్లకి పైగా కాపీలు అమ్ముడుపోయింది లాంటి విషయాల మీద
తర్వాతింకెప్పుడైనా తీరిగ్గా లోతుగా చర్చిద్దాం కానీ ఇప్పుడింకో చిన్న డౌట్ మీతో
పంచుకుంటా 🙂

ఆ పుస్తకం చదువుతున్నపుడు మా రూం కి వచ్చిన జూనియర్ ఒకబ్బాయి- “భయ్యా
భయ్యా నీ దగ్గర భలే పుస్తకాలుంటాయి, నువ్వు చదివాక నాకూ ఇవ్వవా, నేనూ
చదివిస్తా” అనడిగాడు.అసలే ఆ అబ్బాయి మనల్ని కాస్తో కూస్తో- తన ఫ్రెండ్ కం
ఫిలాసఫర్ కం గైడ్ కం కొశ్చెన్ బాంక్ కం టెస్ట్ పేపర్ గా భావిస్తాడు కాబట్టి-
చదవడం అయిపోగానే ఆ అబ్బాయికి పుస్తకమిచ్చేసాను. ఆ అబ్బాయి
తిరిగిచ్చేటపుడడిగాను..ఎలా ఉందీ పుస్తకం అని. “పుస్తకం బాగానే ఉంది కానీ
భయ్యా పుస్తకం లో నాకో డౌట్ ఉంది” అన్నాడు. మతాబులా వెలుగుతున్న మా వాడి
ముఖాన్ని చూస్తే ఏదో క్యాచ్ చేసినవాడిలాగున్నాడు అనిపించింది నాకు 😀

నిజానికి ఈ 7 హ్యాబిట్స్ ఆఫ్ హైలీ ఎఫెక్టివ్ పీపుల్ పుస్తకం లో ఒక పాయింట్ చెప్తాడు కోవే Win/Win గురించి. ఒక త్రిభుజం లో భూమి మీద ఉన్న రెండు శీర్షాల లాగా ఇద్దరు వ్యక్తులు/రెండు సమస్యలు 
ఉన్నార(య)నుకుందాం. అవతలి వ్యక్తి కి మనదారిలోకి రావడం ఇష్టం లేదు, మనకి
అవతలి వ్యక్తి దారిలోకి రావడం ఇష్టం లేదు. నిజానికి అలాంటుపుడు ఇద్దరూ కలిసి
విన్/విన్ మెంటాలిటీ తో ఆలోచిస్తూ పరిష్కారం వైపు పయనిస్తే అప్పుడు త్రిభుజం
లోని మూడో శీర్షం ఎలాగైతే ఈ భూమి మీద ఉన్న ఈ రెండు శీర్షాల దారిలో
కాకుండా – రెండింటి కంటే ఉన్నతమైన ఒక శిఖరాగ్రం మీద ఉంటుందో- అలా
ఇద్దరికీ కూడా వాళ్ళకి కావల్సిన దాని కంటే ఉన్నత ప్రతిఫలం లభిస్తుంది అని
విశదీకరిస్తాడు. ఆ ఎగ్జాంపుల్ చాలనట్టు ఇంకో “లైవ్ ఎగ్జాంపుల్” కూడా ఇస్తాడు- ఒక
ఫ్లాట్ లో ఇద్దరు వ్యక్తులుంటున్నారు, వాళ్ళిద్దరికీ చిన్న గొడవెప్పుడూ- కిటికీ
తెరవమని ఒకడు, కిటికీ మూయమని ఒకడు. ఆ తర్వాత ఇద్దరూ విన్/విన్ మెంటాలిటీ
తో ఆలొచించి చర్చించుకున్నారు. “అసలు నువ్వు కిటికీ ఎందుకు మూయాలనుకుంటున్నావ్”
అడిగాడు మొదటి వాడు. “నాకు వెలుతురు పడటం ఇష్టముండదు, ఇంతకీ నువ్వెందుకు
తెరవాలనుకుంటున్నావ్” అడిగాడు రెండోవాడు. “నాకు ఫ్రెష్ ఎయిర్ కావాలి” అన్నాడు
మొదటివాడు. ఇద్దరూ కలిసి ఒక విన్/విన్ పరిష్కారానికి వచ్చారు. కిటికీ తెరిచి
దానికి కర్టెన్స్ వేసారు. ఇప్పుడు ఫ్రెష్ ఎయిర్ వస్తుంది కానీ వెలుగు రాదు. ఇదీ
విన్/విన్ పరిష్కారం. ఈ ఎగ్జాంపుల్ కూడా మీకు చాలకపోతే ఇంకో ఎగ్జాంపుల్ కూడా
ఇచ్చాడు కోవే, తన పర్సనల్ లైఫ్ లోనుంచి. కోవే వాళ్ళ అమ్మ కోవే ఫ్యామిలీ ఉండే ప్లేస్
నుంచి ఒక గంట కార్ డ్రైవ్ దూరం లో ఉంటుంది వేరే ఫ్లాట్ లో. కోవే రోజూ అమ్మతో
మాట్లాడుతూంటాడు ఫోన్ లో, ప్లస్ వారానికోసరి వాళ్ళమ్మ దగ్గరికి వెళ్ళి ఓ గంట
తనతో స్పెండ్ చేసి, చూసి వస్తూంటాడు. అయితే పోనూ గంట, రానూ గంట + అక్కడ
ఒక గంట అలా వారం లో మొత్తం మూడు గంటలు వాళ్ళమ్మ కోసం స్పెండ్ చేస్తుంటే- కోవే
వాళ్ళావిడ- కోవే తనతో స్పెండ్ చేస్తున్న సమయం తగ్గిపోతున్నందుకు కాస్త
ఫీలయ్యిందట. అప్పుడు కోవే విన్/విన్ మెంటాలిటీ తో ఆలోచించి ఒక పరిష్కారం
కనుక్కున్నాడీ సమస్యకి. బుధవారం కోవే వాళ్ళావిడ చర్చ్ లో Choir కి వెళ్తుంది.
తను వెళ్ళడానికి, అక్కడ కాయిర్ చూసుకుని తిరిగి రావడానికీ అంతా కలిపి
రమారమి మూడు గంటలు పడుతోంది. సో వెంటనే కోవే వాళ్ళమ్మ దగ్గరికి వెళ్ళే తన
ప్రోగ్రాం ని బుధవారానికి మార్చేసుకున్నాట్ట. అలా వాళ్ళావిడ కి తన టైం
తగ్గించకుండా వాళ్ళమ్మకి తన టైం ని కేటాయిస్తూ విన్/విన్ పాటించాట్ట.

మా జూనియర్ కూడా ఇదే విషయమై తన సందేహాన్ని వెలిబుచ్చాడు- “భయ్యా నాకు
తెలీకడుగుతా… కోవే ఏమో వాళ్ళమ్మని తెచ్చి ధైర్యంగా తనింట్లో పెట్టుకోలేడు.
ఎందుకంటే తన మూడు గంటల టైం తీసుకుంటేనే “అఫెండ్” అయిన కోవే వాళ్ళావిడ
వీళ్ళ ఫ్లాట్ లో ఒక రూమిస్తే కోవే ని కుమ్మడం ఖాయం..సరే..అమ్మని తెచ్చి ఇంట్లో
పెట్టుకోకపోతేమాన్లే…ముసలావిడ అక్కడెక్కడో ఒక్కటే ఉంటోంది..వారం మొత్తమ్మీద
ఒక మూడు గంటలు కోవే వాళ్ళమ్మ దగ్గరికి వెళ్తాడు… ఆమె ఎలాగూ ఈయనతోపాటు
రాదు..ఆ మూడు గంటలు కూడా తన టైం లోంచి పోకూడదు అని ఆమె కక్కుర్తి పడితే  
దానికి ఈయన విన్/విన్ సొల్యూషన్ చూసేదేంది భయ్యా 😦 ..దానికి మళ్ళా ఎఫెక్టివ్,
హైలీ ఎఫెక్టివ్ ఏంది భయ్యా నాకర్థం కాక..” అన్నాడు…నేను కామ్ గా ఉంటే..”చెప్పు భయ్యా ఏమంటావ్
నువ్వు..” అన్నాడు మళ్ళీ.

ఇంకేమంటాం..క్లైమాక్సయ్యాక రావుగోపాల్ రావు చిరంజీవికిచ్చే ఎక్స్ప్రెషన్ లాంటిదొకటిచ్చి
తన చేతిలోనుంచి బుక్ తీసుకుని గూట్లో పెట్టా 🙂 . అదీ సంగతి.